Иштирок ва суханронии Э. Раҳмон дар чорабинии ЮНЕСКО ва механизми «СММ-Об»

Июнь 20, 2012 08:24

Душанбе, 20 июн. (АМИТ «Ховар»). — Имрӯз Президенти Ҷумҳурии Тоҷикистон Эмомалӣ Раҳмон барои иштирок дар ҷаласаи умумии Конфронси Созмони Милали Муттаҳид оид ба рушди устувор вориди шаҳри Рио-де-Жанейрои Бразилия гардид.  Нимаи дуюми рӯз Президенти Ҷумҳурии Тоҷикистон Эмомалӣ Раҳмон дар чорабинии якҷояи ЮНЕСКО ва механизми «СММ-Об» оид ба масоили соли байналмилалии ҳамкорӣ дар соҳаи об, ки дар шаҳри Рио-де-Жанейрои Бразилия баргузор шуд, иштирок ва суханронӣ кард. Дар суханронии худ Сарвари давлат Эмомалӣ Раҳмон аз тамоми давлатҳо даъват ба амал овард, ки тавассути амалҳои мушаххас дар соҳаи об ва санитария чораҳои зарурӣ андешанд, то ин ки Соли байналмилалии ду ҳазору сенздаҳуми ҳамкорӣ дар соҳаи об пурсамар ҷамъбаст гардида, натиҷаҳои бадастомада дар солҳои минбаъда барои некӯаҳволии мардум ва муҳити зисти устувор истифода шаванд. Президенти кишвар таваҷҷӯҳи ҳозиринро ба бархе аз масоили Соли байналмилалии ҳамкорӣ дар соҳаи об ҷалб намуда, зарурати роҳандозии ҳамкории муассир ва ҳамаҷонибаро ҷиҳати татбиқи Ҳадафҳои Рушди Ҳазорсола ва дигар мақсадҳои мувофиқашудаи байналмилалӣ дар соҳаи таъминоти об ва санитария таъкид намуд. Ҳамчунин, ҳамкорӣ дар соҳаи об барои таъмини рушди устувор ва пешбурди «иқтисодиёти сабз» мавриди диққати махсуси Эмомалӣ Раҳмон қарор гирифт. Тавре Президенти Тоҷикистон тазаккур дод, «кишварҳо бояд муштаракан амал намуда, афзалиятҳои иҷтимоию иқтисодиро муайян созанд, маблағҳоро ба таври оқилона истифода баранд ва обро барои нигоҳ доштани рушди устувор ва тавозуни экологӣ равона созанд». Зимни суханронии худ, Роҳбари давлати тоҷикон аз бобати таъсири манфии хушкшавии баҳри Арал ба вазъи экологӣ дар ҳавзаи баҳри Арал ва хусусан ба тамоми соҳаҳои иҷтимоию иқтисодии кишварҳои минтақа изҳори нигаронӣ намуд. Чунонки Эмомалӣ Раҳмон пешниҳод кард, «дар чунин ҳолат беҳтар гардидани вазъияти мавҷуда ва рушди минбаъдаи устувори минтақа фақат ба ҳамкории мутақобилан судманд дар бахши истифодаи оқилонаи захираҳои оби минтақа вобаста аст». Дар ин росто Президенти Тоҷикистон зарур донист, ки дар ҳавзаи баҳри Арал, ба ғайр аз стратегияҳои миллӣ, бояд стратегияи ягонаи минтақавии истифодабарии захираҳои оби минтақа амалӣ шавад. Сарвари давлати Тоҷикистон Эмомалӣ Раҳмон, ҳамчунин таклиф намуд, ки дар ҷараёни татбиқи Соли байналмилалии ҳамкорӣ дар соҳаи об ба масоили ҳамкорӣ дар соҳаи ҳифзи сарчашмаҳои оби нӯшокӣ диққати махсус дода шавад.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.

Июнь 20, 2012 08:24

Хабарҳои дигари ин бахш

Дар Испания бар асари сӯхтори ҷангал қариб ҳазор нафар кӯчонида шуд
Қазоқистон бо сабаби пешгирии бемории обилаи маймун назорати сарҳадиро пурзӯр менамояд
Теъдоди ҳалокшудагон бар асари бориши шадид дар Покистон ба 195 нафар расид
Боронҳои шадид дар Чехия сатҳи оби дарёҳоро баланд намуд
Мақомоти Судон ба таври расмӣ авҷгирии бемории ваборо эълон намуданд
Дар Душанбе «Иди тарбуз ва харбузаву каду» баргузор мегардад
«МегаФон Football Day: бозӣ бо ситораҳо»: ҳамаро даъват менамоем!
Дар Димишқ китоби академик Бобоҷон Ғафуров «Тоҷикон» маротибаи дуюм ба нашр расид
Имрӯз дар ноҳияҳои водигии Тоҷикистон ҳаво то 38 дараҷа гарм мешавад
Дар ноҳияи Шамсиддини Шоҳин ба маблағи зиёда аз 20 миллион сомонӣ корҳои сохтмонӣ ба анҷом расиданд
Дар ноҳияи Рашт мумфаршкунии зиёда аз 3 километр роҳи дохилии деҳаи Поҷеи поён оғоз гардид
Мақолаи олими тоҷик дар озмуни «Беҳтарин лоиҳаи байналмилалии соҳаи маориф» дар Испания сазовори ҷойи дуюм гардид