Шиносоии О. Оқилов аз рафти корҳои сохтмони роҳи оҳани Душанбе-Қӯрғонтеппа

Душанбе, 16 июн. (АМИТ «Ховар», Дилшодаи Хайруллоҳ).- Имрӯз Сарвазири Ҷумҳурии Тоҷикистон Оқил Оқилов бо рафти корҳои сохтмони роҳи оҳани Душанбе — Қӯрғонтеппа дар қитъаи Ваҳдат — Ёвон шинос шуд. Тавре аснои шиносоӣ маълум гардид дар айни замон корҳои сохтмонӣ бо дастгирию маблағгузории Ҳукумати Ҷумҳурии Тоҷикистон ва Корхонаи воҳиди давлатии «Роҳи оҳани Тоҷикистон» дар хатти нави роҳи оҳан — қитъаи Ваҳдат — Ёвон бо маром идома доранд. Аз соли 2009 то инҷониб дар қитъаи роҳ ба андозаи қариб 2,5 млн. метри мукааб корҳои заминӣ иҷро, 29 адад иншооти хурди сунъӣ сохта шуда зиёда аз 5 км хатти роҳ васл гардидааст. Ҳамзамон як гузаргоҳи автомобилӣ ба истифода супурда шуда 5,2 км хатти роҳи оҳани Ваҳдат — Элок таъмир ва 11,5 км фосилаи хатти роҳи Роҳатӣ — Ваҳдат аз тарафи қитъаи Душанбе 5,8 км фосилаи роҳи Қӯрғонтеппа — Вахш аз тарафи қитъаи Қӯрғонтеппа азнавсозӣ шудааст. Таъкид кардан зарур аст, ки сохтмони хатти нави роҳи оҳани Душанбе — Қӯрғонтеппа, қитъаи Ваҳдат — Ёвон бо супориши Президенти Ҷумҳурии Тоҷикистон Эмомалӣ Раҳмон соли 2009 оғоз гардида, он силсилаи марказии роҳи оҳани дар оянда сохташавандаи Эрон — Афғонистон — Тоҷикистон — Қирғизистон ва Хитой ба ҳисоб меравад. Сарвазири мамлакат ва ҳайати ҳамроҳонаш бевосита бо рафти корҳо дар мавзеи бунёди нақб ва пулҳои бузург шинос шуданд, ки дар айни замон барои оғоз намудани сохтмони онҳо таввасути ҷалби сармояи хориҷӣ тадбирҳои омодагӣ амали гардида истодаанд. Иншооти мазкур мувофиқи асосноккунии техникиву иқтисодӣ 130 млн. доллари америкоӣ арзиш дошта, сохтмони 18 пули хурду бузург ва 1 нақб бо дарозии 2340 метрро дар бар мегирад. Дар айни ҳол барои пешбурди корҳои роҳсозӣ 65 адад мошину таҷҳизоти муосир ва 167 нафар коргар ҷалб карда шудааст. Сарвазири мамлакат Оқил Оқилов зимни боздид аз рафти корҳо, машварат ва сӯҳбату вохӯриҳо бо мутахассисону роҳсозон доир намуда, изҳор дошт, ки сохтмони хатти нави роҳи оҳани Душанбе-Қӯрғонтеппа, ки ҳоло дар қитъаи асосии он Ваҳдат — Ёвон сохтмончиёну роҳиоҳанчиён самаранок фаъолият намуда истодаанд, яке аз иншооти дорои аҳамияти муҳими иқтисодиву иҷтимоӣ ба шумор рафта, дар сурати ба кор оғоз намудани хатти роҳи оҳани мазкур бору мусофиркашонӣ аз марказ ба ҷануби ҷумҳурӣ осон ва масофаи роҳ 321 км кӯтоҳтар мешавад, ки ин ҳамаҷониба мусоиду мувофиқ ва ба манфиати кор мебошад. Дар машварати корӣ аз рафти корҳои анҷомдодашуда изҳори қаноатмандӣ гардида таъкид шуд, ки хизмат ва заҳматҳои роҳсозони ин иншооти азим аз ҷониби роҳбарияти давлату ҳукумати мамлакат пайваста қадр карда мешавад. Собиқадорони кор ва фаъолони соҳа дар ҳамин машварат бо туҳфаҳои арзишманди пулию молӣ сарфароз гардонида шуданд.Оқил Оқилов масъулони соҳа, роҳбарияти Корхонаи воҳиди давлатии «Роҳи оҳани Тоҷикистон» ва мутахассисону роҳсозони ин иншооти аҳамияти бузург доштаи мамлакатро вазифадор намуд, ки барои ҷалби сармояи хориҷӣ бо мақсади пешбурди сохтмони иншоот тадбирҳои зарурӣ андешида корҳои сохтмониро мувофиқ ба талаботи муосири роҳсозӣ ба роҳ монанд ва барои дар мӯҳлати муайянгардида сохта мавриди баҳрабардорӣ қарор дондани роҳи оҳан аз имконоту захираҳои мавҷуда самаранок истифода намоянд.