Татбиқи марҳалаи сеюми лоиҳаи «Шағон – Зиғор»

Душанбе, 25 июн. (АМИТ «Ховар», Кристина Эрлих). – Таҷҳизот ва техникаи махсуси марҳалаи сеюми сохтмони роҳи мошингарди «Шағон — Зиғор» ба Тоҷикистон оварда шуд. Тавре ки аз Маркази татбиқи лоиҳаи сохтмони роҳи мошингарди «Шағон – Зиғор» — и Вазорати нақлиёти ҶТ ба мухбири АМИТ «Ховар» хабар доданд, техникаи нави махсус на фақат имконияти тезонидани корҳои сохтмониро фароҳам меорад, балки сифати корро дар иншооти мазкур низ беҳтар месозад. Алҳол дар сохтмони ин роҳи мошингард 57 адад техникаи мухталиф мавриди истифода қарор дорад. Қобили зикр аст, ки пудратчии асосии сохтмони роҳи мошингард ширкати «Собин» — и Эрон мебошад. Алҳол ширкати мазкур таҳкимкории соҳилҳо ва бетонрезиро идома дода, марҳалаи дуюми татбиқи лоиҳаро анҷом медиҳад. Масофаи марҳалаи сеюми лоиҳа 18,7 километрро ташкил медиҳад. Мӯҳлати ба истифода додани лоиҳа 2 сол аст. Ин лоиҳа аз ҳисоби маблағҳои Бонки исломии тавсеа ва Ҳукумати Тоҷикистон дар амал татбиқ мешавад.