Иваз намудани баландгўякҳо ба дастгоҳҳои тақвияти овоз дар масҷидҳо

Душанбе, 3 июл.(АМИТ «Ховар», Марзия Саидова).-Минбаъд аз тарафи имомхатибони масҷидҳои панҷвақта ва ҷомеъ истифодаи ғайримақсадноки баландгўякҳо ҳангоми баргузории намозҳои фарзӣ дар пойтахт ҷилавгирӣ карда шуда, истифодаи дастгоҳҳои тақвияти овоз ба роҳ монда мешаванд. Ин раванд аз ҷониби шаҳрдорӣ зимни баргузории ҷаласа, ки таҳти раёсати раиси шаҳри Душанбе Маҳмадсаид Убайдуллоев бо иштироки аҳли ҷамоатчигӣ, роҳбарони мақомоти ҳифзи ҳуқуқ, комиссияҳои доимии Маҷлиси вакилони халқи шаҳри Душанбе, институтҳои намояндагӣ ва имомхатибони масҷидои панҷвақта ва ҷомеи шаҳр баргузор шуд, муқаррар гардид. Ҳамзамон ба мақомоти ҳифзи ҳуқуқ дастур дода шуд, ки масъалаи насбу истифодаи камераҳои мушоҳидавӣ дар тамоми субъектҳои хоҷагидории шаҳр, аз ҷумла дар масҷидҳо барои таъмини амнияти намозгузорон мавриди омўзишу таҳлил қарор дода шавад. Ин тадбир тибқи муқаррароти қарори марбутаи шаҳрдорӣ андешида мешавад, иттилоъ медиҳад Шавкат Саидов, котиби матбуотии раиси шаҳри Душанбе. Инчунин бо дахли ғанӣ гардонидани бозори истеъмолӣ бо маҳсулот дар арафаи моҳи шарифи Рамазон зикр шуд, ки аз иқтидори касбии имомхатибон бобати ба адлу инсоф ҳидоят намудани соҳибкорони бозорҳо истифода шавад.