П. Флор: «Стратегияи нави Иттиҳоди Аврупоро қабул менамоем»

Душанбе, 23 июл. (АМИТ «Ховар», Афшини Муқим)- Имрӯз Президенти Ҷумҳурии Тоҷикистон Эмомалӣ Раҳмон намояндаи махсуси навтаъйини Иттиҳоди Аврупо оид ба Осиёи Марказӣ Патрисия Флорро ба ҳузур пазируфт. Эмомалӣ Раҳмон аз сатҳи ҳамкориҳои Тоҷикистон ва Иттиҳоди Аврупо қаноатмандӣ намуда, изҳори боварӣ намуд, ки ҳамкории Тоҷикистон бо Иттиҳоди Аврупо минбаъд низ густариш хоҳад ёфт. Президент афзуд, ки ҷониби Тоҷикистон омода аст ҳамкориҳои худро бо Иттиҳоди Аврупо дар соҳаҳои ҳифзи иҷтимоии аҳолӣ, тандурустӣ, маориф ва рушди иқтисодиёт, аз ҷумла бахши хусусии он, тиҷорат ва сармоягузорӣ, бахшҳои мухталифи саноат, гидроэнергетика, нақлиёт ва кишоварзӣ тавсеа бахшад.
 
Патрисия Флор низ дар навбати худ иброз дошт, ки таҳкурсии ҳамкории байни Иттиҳоди Аврупо ва Тоҷикистон мустаҳкам бино шудааст ва он дар самти боз ҳам густурдатар гардидани равобити Тоҷикистону Иттиҳоди Аврупо саҳми намоён хоҳад дошт. Номбурда таъкид намуд, ки мо ҳамкориҳои худро бо Тоҷикистон дар бахшҳои мухталиф, аз ҷумла мубориза бо терроризму ифротгароӣ, гардиши ғайриқонунии маводи мухаддир ва амсоли ин беш аз пеш тақвият дода, ба ин восита робитаҳои худро дар соҳаҳои гуногун густариш хоҳем дод.
Патрисия Флор гуфт, стратегияи Иттиҳоди Аврупо дар Осиёи Марказӣ соли оянда ба охир мерасад ва мо омодаем, стратегияи нави Иттиҳоди Аврупо дар минтақаро таҳия ва қабул намоем.