Тақдими адабиёти коллеҷи зардуштӣ ба Китобхонаи миллӣ

Душанбе, 31 июл. (АМИТ «Ховар», Раъно Нусратуллоева).-Имрӯз ба Китобхонаи миллии Тоҷикистон президенти коллеҷи зардуштиёни шаҳри Мумбай профессор Меҳер Мастер Мусс ташриф оварда, аз номи коллеҷи зардуштиён ба хонандагони тоҷик зиёда аз 50 адад адабиёт тақдим намуд. Китобҳои мазкур ба мавзӯъ ва соҳаҳои гуногун башида шудаанд. Бино ба гуфтаи хонум Меҳер Мастер Мусс ин китобҳо аз он ҷиҳат нодир ба шумор мераванд, ки танҳо дар як нусха чоп шуда, дар ягон китобхонаи ҷахон дастрас нест.Ҷараёни интиқоли китобҳо ба тариқи расмӣ дар Китобхонаи миллии Тоҷикистон сурат гирифта, дар он муовини аввали директори китобхона Саидҷаъфар Сафаров, намояндагони сафоратхонаи Ҳиндустон дар Тоҷикистон, кормандони Китобхонаи миллии Тоҷикистон ширкат варзиданд.Ёдовар бояд шуд, ки солҳои зиёд аст хонум Меҳер Мастер Мусс бо Ҷумҳурии Тоҷикистон ва Сафорати он дар Ҷумҳурии Ҳиндустон ҳамкориҳои зич дорад. Чанде пеш тариқи сафорат аз ҷониби коллеҷи зардуштиён барои Китобхонаи миллии Тоҷикистон зиёда аз 200 адад китоби ҷолиб фиристода шуда буд.