Ҳамкориҳои минтақавӣ ва таҳкими боварӣ дар Осиёи Марказӣ ва Афғонистон

Душанбе, 1 август. (АМИТ «Ховар», Покиза Маҳмадбекова). — Имрӯз дар Вазорати рушди иқтисод ва савдо дар доираи лоиҳаи «Ҳамкориҳои минтақавӣ ва таҳкими боварӣ дар Осиёи Марказӣ ва Афғонистон» бо иштироки мутахассисони Вазорат ва намояндагони вазорату идораҳои соҳавӣ доир ба масъалаҳои савдои хориҷӣ ва нақши роҳҳои нақлиётӣ дар рушди савдои минтақавӣ семинари омӯзишӣ баргузор гардид. Дар кори семинар масъулини лоиҳаи мазкур- корманди калони илмӣ ва ҳамоҳангсози лоиҳа аз Донишкадаи идораи давлатӣ ва сиёсати Донишгоҳи Осиёи Марказӣ Р.Могилевский дар мавзӯи «Тамойюлоти савдои хориҷии кишварҳои Осиёи Марказӣ» ва корманди калони илмии ҳамин донишкада Ш.Асадов таҳти унвони ба «Роҳравҳои нақлиётии Тоҷикистон ва иқтидори онҳо барои рушди савдои минтақавӣ» маърӯза намуданд. Дар атрофии мавзӯъҳое, ки мавриди баҳс қарор гирифтанд, байни иштирокдорони семинар ва маърӯзачиён суолу ҷавоб ва мубодилаи афкори судманд сурат гирифт.