Коҳиши бемориҳои сироятӣ дар ҷумҳурӣ

Душанбе, 27 август.(АМИТ «Ховар», Лаззат Диловарзод).- Тибқи маълумоти Вазорати тандурустии Ҷумҳурии Тоҷикистон, дар соли ҷорӣ ба бемориҳои сирояткунандаи ҷудогона гирифтор шудани аҳолӣ коҳиш ёфтааст. Асосан дар соли ҷорӣ бемориҳои сирояткунандаи шадиди рӯда бештар ба қайд гирифта шудааст, ки он 56, 6 фоизи ин бемориҳоро ташкил медиҳад.Ба иттилои манбаъ, дар 7 моҳи соли ҷорӣ шумораи умумии гирифторони бемории шадиди рӯда 26 ҳазору 18 нафар, аз ҷумла беморони ба истиҳоли хунини бактериалӣ гирифтор 367 нафар ва беморони гирифтори касалии сироятии домана 37 нафарро ташкил дод, ки ин нисбат ба ҳамин давраи соли 2011-ум 19,6 фоиз кам аст. Дар 7 моҳи соли ҷорӣ бо сабабҳои гуногун теъдоди гирифторони гепатити (бемории ҷигар) шадиди сироятии «А» ба 4 ҳазору 187 нафар расид, ки 3532 нафари онро беморони гепатити «А», 190 нафари онро беморони гепатити «В», 40 нафар ба бемории гепатити «С» ва 40 нафар гирифтори бемории гепатити музмин гардиданд. Дар ин муддат ҳамчунин 2788 нафар ба бемориҳои «носозгориҳои иҷтимоӣ» ва 26 ҳазору 888 ҳодисаи ба бемориҳои паразиторӣ (лямблиоз, аскаридоз, энтерибиоз, геминолепидоз) гирифтор шудани аҳолӣ ба қайд гирифта шудааст.