Соҳибкор бо героин дастгир шуд

Душанбе, 28 август. (АМИТ «Ховар», Мавҷуда Анварӣ). — Дирӯз кормандони Агентии назорати маводи нашъаовари назди Президенти Ҷумҳурии Тоҷикистон боз як кӯшиши интиқоли маводи мухаддирро пешгирӣ карданд.Бо қабули хабари фаврӣ кормандони Агентӣ дар ҳудуди шаҳри Душанбе шаҳрванди 36-солаи зодаи ноҳияи Тоҷикободро, ки ба соҳибкорӣ машғул буд, дар хонаи иҷоравиаш дастгир намуданд. Дар вақти тафтиш аз даруни хона 102 ғилофаки маводи кулӯхчамонанди сафеду зардчатобдор ёфт ва мусодира шуд.Маводи мусодирашуда воситаи нашъадори героин буда, вазни он қариб 1 килоро ташкил дод.Нашъаҷаллоб мақсад дошт, ки ин миқдор маводи мухаддири сахттаъсирро дар ҳудуди шаҳри Душанбе фурӯшад.Аз рӯи ин ҳодиса парвандаи ҷиноятӣ оғоз гардида, тафтишот идома дорад.