Қ. Расулзода: «Ба ҳама гуна иғвою бӯҳтон зарбаи комил мезанем»

Душанбе, 7 сентябр. (АМИТ «Ховар», Бекназари Абӯбакр). — 5-уми сентябри соли ҷорӣ дар шаҳри Хуҷанд бо конференсияи илмӣ — амалӣ бахшида ба 20-солагии Иҷлосияи 16-уми Шӯрои Олии Тоҷикистон дар мавзӯи «Сиёсати давлатӣ дар соҳаи муқовимат бо экстремизм ва терроризм: вазъият ва дурнамо» баргузор гардид, ки дар он раиси вилоят Қоҳир Расулзода иштирок намуд. Аз хадамоти матбуоти раиси вилоят ба АМИТ «Ховар» иттилоъ доданд, ки Қ. Расулзода зимни суханронӣ дар ин конфронс қайд кард, ки имрӯз ба ҷавонони мо барои таҳсил ва истироҳат кулли шароит фароҳам оварда шудааст, то ин ки онҳо ба ҳар гуна ҳаракатҳои иғвоангезу равияҳои номатлуб ҳамроҳ нагарданд. Мутаассифона, чунин гаравиданҳо аз ҷониби баъзе ашхос ба мушоҳида мерасад, ҳол он ки онҳо насли даврони Истиқлолият ва қувваи ояндасози ҷомеа мебошанд. «Мо сиёсати Ҳукумати Ҷумҳурии Тоҷикистонро дар бахши аҳзоби сиёсӣ, тарбияи насли наврас ҷонибдорӣ карда, ба ҳама гуна иғвою бӯҳтон, экстремизм ва ҷудоихоҳии динию мазҳабӣ бо донишу амали инсонпарварона зарбаи комил мезанем», — изҳор дошт Қ. Расулзода.Шариф Назаров- сардори Раёсати ВКД Ҷумҳурии Тоҷикистон дар вилоят, генерал- майори милитсия, Шариф Қурбонов — прокурори вилояти Суғд, генерал-майори адлия ва С. Сайдалиев-сардори Сарраёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон, полковники адлия дар мавзӯъҳои «Вилояти Суғд дар мубориза алайҳи терроризму экстремизм: дирӯз ва имрӯз», «Сабабу омилҳои пайдоиши терроризму экстремизм» ва «Ахлоқи терроризм ва коррупсия» маърӯза карданд.