Мулоқоти Э. Раҳмон бо Муовини парлумонии вазири корҳои хориҷии Япония

Душанбе, 14 сентябр. (АМИТ «Ховар»,)- Имрӯз Президенти кишвар Эмомалӣ Раҳмон Муовини парлумонии вазири корҳои хориҷии Япония Казуюки Хамадаро ба ҳузур пазируфт.Дар мулоқот масоили вобаста ба муносиботи судманди ду кишвар баррасӣ шуд.Ҳарду ҷониб аз татбиқи босамари лоиҳаҳои сершумори гуманитарӣ, иҷтимоӣ ва нақлиётию роҳсозӣ дар Тоҷикистон изҳори қаноатмандӣ карданд.Ҳамзамон таъкид гардид, ки имкону захираҳои истифоданашуда барои густариши робитаҳо, хусусан робитаҳои иқтисодию сармоягузорӣ дар бахшҳои энергетика, истихроҷ ва коркарди сарватҳои зеризаминӣ, саноати сабуку хӯрокворӣ, ҳанӯз хеле зиёданд.Ба гуфти Казуюки Хамада, кишвари ӯ дар доираи Гуфтугӯи «Осиёи Марказӣ+Япония» иштироки худро дар татбиқи лоиҳаҳои зербиноии дорои аҳамияти минтақавӣ дар бахшҳои энергетика, нақлиёту роҳсозӣ, пайвастани шабакаҳои барқию нақлиётии кишварҳои Осиёи Марказӣ бо Афғонистону Покистон ва дигар давлатҳои Осиёи Ҷанубӣ тавсиа мебахшад.Баррасии авзои кунунӣ ва ояндаи Афғонистон, барқарорсозии ҳаёти осоишта дар ин кишвар, пеш аз ҳама аз тариқи татбиқи лоиҳаҳои иҷтимоию иқтисодӣ ва сармоягузорӣ, аз мавзӯъҳои асосии суҳбат буд.Дар мулоқот, ҳамчунин доир ба масоили байналмилалӣ ва дигар мавзӯъҳои мавриди таваҷҷуҳ табодули назар карда шуд.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.