Пуштунҳо дар ҳошияи таърихи даҳ қавми гумшудаи Бани Исроил

Душанбе,28 сентябр. (АМИТ «Ховар» Зарангез Латифова).-Чанде қабл нашриёти «LAP LAMBERT Academic Pablishing» таҳқиқоти монографии олими шинохтаи тоҷик, афғоншинос Саид Ҳомидовро таҳти унвони «Пуштунҳо дар ҳошияи таърихи даҳ қавми гумшудаи Бани Исроил» ба забонҳои русӣ ва англисӣ ба нашр расонид.Асари мазкур нахустин таҳқиқоти мукаммал ва илмӣ доир ба этногенез ва таърихи этникии пуштунҳо дар адабиёти илмии ватанӣ ва хориҷӣ ба ҳисоб меравад. Баҳси пуштунҳо ва таърихи равобити он бо яҳудиён дар таърих доманаи васеъ дошта, ҳатто назарияи пайдоиши пуштунҳоро аз яҳудиён ба вуҷуд овардааст.Муаллиф дар асоси далелҳои таърихӣ — этнографӣ ва таҳлилӣ насабномаи пуштунҳо, ҳамчунин истифода аз маълумотҳои навини генетикаи инсон ва дигар усулҳои иҷтимоӣ кӯшиш ба харҷ додааст, баҳсу мунозираро дар атрофи ин масъала равшан созад. Боиси хурсандист, ки Китобхонаи Миллии кишвари Олмон ин асарро ба феҳристи муътабари библиографии худ дохил кардааст ва изҳори назар доштааст, ки нусхаи англисии он дар ҳоли ҳозир дар кишварҳои аврупоӣ яке аз пурхонандатарин асари илмӣ роҷеъ ба қавму қабилаи ҷомеаи пуштунҳо ба ҳисоб меравад. Ин чаҳорумин асари муаллиф аст, ки дар хориҷи кишвар бо забонҳои русӣ, англисӣ ва олмонӣ ба нашр расидааст.