Таҷлили Истиқлолияти Тоҷикистон дар Кореяи Ҷанубӣ

Душанбе, 19 сентябр. (АМИТ «Ховар», Ибодат Давлатова).- Бахшида ба 21-умин солгарди Истиқлолияти Ҷумҳурии Тоҷикистон Дар шаҳри Сеул вохӯрии навбатии «Ҷамъияти тоҷикон дар Кореяи Ҷанубӣ» доир гардид. Дар ин бора ба АМИТ «Ховар» сардори маркази матбуоти Хадамоти муҳоҷирати назди Ҳукумати Ҷумҳурии Тоҷикистон Абдуллоҳи Қодирӣ иттилоъ дод. Дар чорабинӣ донишҷӯёни Тоҷикистон ва меҳмонони хориҷӣ аз кишварҳои Корея, Қирғизистон, Қазоқистон, Эфиопия ва бархе аз мамлакатҳои дигар иштирок карданд. Нахуст донишҷӯёни тоҷик дар бораи таҳсил, фаъолият ва зиндгии худ дар ин кишвар сӯҳбат намуда, инчунин раиси «Ҷамъияти тоҷикон дар Кореяи Ҷанубӣ» Рустамҷон Бобоев доир ба аҳамияти Истиқлолият ва дастовардҳои он сухан гуфта, аъзои чамъиятро ба ватандӯстию худогоҳӣ, ваҳдат ва ҳамдигарфаҳмӣ, азхуд намудани илмҳои замонавӣ ва забономӯзӣ даъват намуд. Дар интиҳои ҷамъомад базми идона ташкил шуда, бо омода кардани хӯрокҳои миллӣ мулоқоти навбатии «Ҷамъияти тоҷикон дар Кореяи Ҷанубӣ» ба анҷом расид, -хабар дод А.Қодирӣ.