Дар 10 соли охир 5,3 миллиард сомонӣ барои бунёдкорӣ дар Суғд

Истаравшан, 27 октябр. (Афшини Муқим, Дилшодаи Хайруллоҳ)- Бегоҳии имрӯз Президенти Ҷумҳурии Тоҷикистон Эмомалӣ Раҳмон дар маросими баистифодадиҳии варзишгоҳи таҷдидшудаи шаҳри Истаравшан иштирок ва суханронӣ намуда, варзишгоҳи мазкурро мавриди баҳрабардорӣ қарор дод ва дар тантанаҳои бошукӯҳи идона, ки бахшида ба анҷоми пурраи навсозии шоҳроҳи Душанбе-Чанак ва дар доираи ҳамин лоиҳа сохта ба истифода дода шудани нақби «Шаҳристон» омода шуда буданд, ширкат кард. Гуфта шуд, ҷиҳати таҷдиди ин варзишгоҳ беш аз 13 миллион сомонӣ аз ҳисоби маблағҳои буҷетӣ ҷудо гардида, он дорои 18 ҳазор ҷойи нишаст шудааст. Акнун, мардуми шаҳри Истаравшан метавонанд бо истифода аз имконоти варзишгоҳи мазкур ҷиҳати рушди ҳамаҷонибаи варзиш ва оммавигардонии он, ҳамчунин тарғибу ташвиқи тарзи ҳаёти солим беш аз пеш саъю талош намуда, бахусус дар роҳи тарбияи дурусти ҷавонон ба натиҷаҳои назаррас ноил гарданд. Эмомалӣ Раҳмон дар суханронии худ зикр кард, ки дар даҳ соли охир дар вилояти Суғд барои бунёду азнавсозии иншооти гуногуни иқтисодиву иҷтимоӣ аз ҳисоби ҳамаи сарчашмаҳои маблағгузорӣ 5,3 миллиард сомонӣ сармоягузорӣ гардидааст ва ҳамоно ин иқдомот идома хоҳанд ёфт. Ҳамчунин, Сарвари давлат аз корҳои азнавсозӣ дар роҳҳои мошингарди Шоҳон — Зиғар, Кӯлоб — Қалъаи Хумб, Душанбе -Турсунзода, Айнӣ — Панҷакент ва сохтмони нақби «Чормағзак» ёдовар шуда, таъкид дошт, ки мо, мардуми тамаддунсоз ва меҳнатқарину сарбаланди тоҷик ба шарофати соҳибистиқлолии кишвар, пойдории сулҳу субот, ваҳдату ягонагӣ ва бо азму талоши созандаи хеш Ватани маҳбубамонро аз бунбасти коммуникатсионӣ раҳоӣ бахшидем ва дар ин асос заминаи мусоидро барои рушди бахшҳои гуногуни иқтисоди миллӣ фароҳам овардем. Гуфтанист, ки Эмомалӣ Раҳмон ҷиҳати таҷдиди варзишгоҳи шаҳри Истаравшан ҳанӯз моҳи августи соли гузашта дар доираи сафари кории худ ба вилояти Суғд ба мақомоти иҷроияи маҳаллии ҳокимияти давлатии шаҳри Истаравшан ва сохтору мақомоти дахлдор дастур дода буд.