Маблағгузорӣ ва рақобатпазирӣ дар Осиёи Марказӣ

Душанбе, 18 октябр. (АМИТ «Ховар», Фарзона Достонзода). – Зимни мулоқоти раиси Палатаи савдо ва саноати Ҷумҳурии Тоҷикистон Шариф Саид бо роҳбари раёсати рушди бахши инфиродӣ Антонио Сомма масоили иштироки Тоҷикистон дар лоиҳаи Созмони ҳамкорӣ ва рушди иқтисодӣ таҳти унвони «Маблағгузорӣ ва рақобатпазирӣ дар Осиёи Марказӣ», ҳамчунин рушди минбаъдаи лоиҳаи мазкур мавриди муҳокима қарор гирифтанд. Тавре ки аз Палатаи савдо ва саноати ҶТ ба АМИТ «Ховар» хабар доданд, Антонио Сомма зикр намуд, ки сар аз соли 2013 лоиҳаи мазкур барои дастгирии татбиқи тавсияҳо дар Тоҷикистон роҳандозӣ мешавад. Дар ҷараёни мулоқот иштироки бахши давлатию инфиродӣ дар лоиҳа, ҳамчунин истифодаи тавсияҳои сиёсӣ дар чунин соҳаҳо, аз қабили сиёсати маблағгузорӣ, дастёбӣ ба маблағгузорӣ ва рушди сармояи инфиродӣ дар бахшҳои интихобшудаи таҷрибавии иқтисодиёт таъкид гардид.Шариф Саид ин ибтикорро пуштибонӣ намуда, иброз дошт, ки Палатаи савдо ва саноати Ҷумҳурии Тоҷикистон дар муҳокимаи лоиҳа фаъолона иштирок намуда ва мадади зарурӣ мерасонад.