Муҳокимаи масоили ёрӣ ба муҳоҷирон

Душанбе, 17 октябр. (АМИТ «Ховар», Лутфия Эшонқулова). – Намояндагии минтақавии ҷамъиятҳои миллии Салиби Сурх ва Ҳилоли Аҳмар якҷоя бо Палатаи ҷамъиятии Федератсияи Русия дар шаҳри Маскав мизи мудаввар дар мавзӯи «Самараи ёрӣ ба муҳоҷирон: мақому манзалати ҷамъиятҳои миллии Салиби Сурх ва Ҳилоли Аҳмар» — ро доир намуд. Дар ҷаласаи мизи мудаввар намояндагони ҷамъиятҳои миллии Ҳилоли Аҳмари Қазоқистон, Қирғизистон, Тоҷикистон ва Ӯзбекистон, ҳамчунин вакилони Хадамоти муҳоҷирати Федератсияи Русия ва давлатҳои Осиёи Марказӣ иштирок доштанд.Мувофиқи хабари дафтари матбуоти Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия, иштирокдорони ин чорабинӣ зимни суханрониашон зикр намуданд, ки тайи якчанд соли охир дар амри расонидани ёрӣ ба муҳоҷирон таҷрибаи зиёде андӯхта шудааст.Дар анҷоми мулоқот иштирокдорони он зикр намуданд, ки бояд саъю кӯшишҳо ҷиҳати дастгирии иҷтимоию ҳуқуқии муҳоҷирон, ҳамчунин расонидани кӯмак барои пайдо ва барқарор намудани равобити оилавии онҳо танзим карда шавад.