Пардохти ҳаққи алоқаи мобилӣ боз ҳам дастрастар шуд!

Душанбе, 15 октябр.(АМИТ «Ховар» Ибодат Давлатова)- Хизматрасонии «Пардохти ҳаққи алоқаи мобилӣ» акнун барои мизоҷони ширкати «Вавилон-Мобайл» дастрастар шуд. Тавре ки аз ҶСК «Агроинвестбонк» иттилоъ доданд, дорандагони кортҳои пластикии «Агроинвестбонк» низ метавонанд ҳисобҳои худро тавассути банкоматҳои бонк, низоми «Интернет-бонкинг» ва «Бонкинги мобилӣ» бидуни комиссия пур намоянд. Дар банкоматҳои бонкӣ муштарӣ метавонад амалиёти «Пардохти алоқаи мобилӣ»-ро интихоб намуда, дар низоми вақти ҷорӣ ҳаққи хизматрасонии алоқаи мобилии ширкати «Вавилон-Мобайл»-ро пардохт намояд. Бояд гуфт, ки тавассути хизматрасониҳои «Интернет-бонкинг» ҳар як шахс метавонад пардохти худро дар низоми автоматӣ ба нақша гирад. Дар ин ҳолат тавозуни телефони мобилии онҳо дар сана ва вақти нишондода ба таври автоматӣ пур карда мешавад.