Робитаҳои фарҳангии Тоҷикистон ва Чин таҳким меёбанд

Душанбе,15 октябр. (АМИТ «Ховар», Раъно Нусратуллоева).- Ҳайати Ҷамъияти халқии дӯстӣ ва равобит бо кишварҳои хориҷии шаҳри Шанхайи Ҷумҳурии мардумии Чин бо сарварии котиби генералии ҷамъият Юй Тзанхао бо сафари дӯстӣ дар Ҷумҳурии Тоҷикистон қарор дорад.Имрӯз дар Китобхонаи миллии Тоҷикистон Аҳдномаи ҳамкориҳо байни Ҷамъияти дӯстӣ ва равобити фарҳангии Тоҷикистон бо кишварҳои хориҷӣ (ҶДРФТ) ва Ҷамъияти халқии дӯстӣ ва равобит бо кишварҳои хориҷии шаҳри Шанхайи Ҷумҳурии мардумии Чин то соли 2017 имзо шуд. Мувофиқи аҳднома тарафҳо ҳамкории муфидро доир ба фарҳанг, маориф, илму техника, варзиш ва сайёҳӣ ривоҷ медиҳанд. Ин ҳамкорӣ, бешубҳа, барои мустаҳкам шудани дӯстии байни халқҳои Чин ва Тоҷикистон мусоидат мекунад. Аҳдномаро Юй Тзанхао ва раиси Ҷамъияти дӯстӣ ва равобити фарҳангии Тоҷикистон бо кишварҳои хориҷӣ Сайдулло Хайруллоев имзо намуданд. Дар маросими имзои аҳднома намояндагони ҷамъиятҳои дӯстӣ, вазоратҳои фарҳанг ва маориф, устодон ва донишҷӯёни макотиби олие, ки шуъбаҳои забони чинӣ доранд, ҳамчунин намояндагони Маркази Конфутсияи назди Донишгоҳи миллии Тоҷикистон иштирок намуданд. Дар китобхонаи миллӣ инчунин намоиши аксҳо таҳти унвони «Шанхайи гуманитарӣ» ва намоиши китобҳо таҳти унвони «Дарича ба сӯйи Шанхай» кушоиш ёфтанд.Китобҳое, ки ба намоиш гузошта шуда буданд, ба Китобхонаи миллӣ супорида мешаванд. Сафари  ҳайати Ҷамъияти халқии дӯстӣ ва равобит бо кишварҳои хориҷии шаҳри Шанхайи Ҷумҳурии мардумии Чин пагоҳ, 16 октябр ба анҷом мерасад.