Синамогарон ба «Дидор»-и ҳам мерасанд

Душанбе, 12 октябр (АМИТ «Ховар», Музаффари Рустам) — Аз 16 то 20 октябри соли 2012 бо кӯмаки молиявии Институти «Ҷамъияти Кушода”- Бунёди Мадад дар Тоҷикистон, Ташкилоти «Hivos»-и Нидерданд ва Дафтари ҳамкории Швейтсария дар Тоҷикистон дар Хонаи кинои шаҳри Душанбе кинофестивали панҷуми байналмилалии «Дидор» баргузор мешавад. Ба иттилои маъмурияти кинофестивал, дар ҷашнвораи панҷуми синамоии «Дидор» 75 филме, ки тайи ду соли охир таҳия шудаанд, аз 19 кишвар ба тамошо гузошта мешавад. Дар озмуни байналхалқӣ 23 филми ҳунарӣ иштирок мекунад. Аз Тоҷикистон 3 филм: «Телеграмма»-и коргардон Искандар Усмонов, филми «Чарх»-и коргардон Шаҳзод Раҷабов ва филми кӯтоҳи «Хорсаро» — и донишҷӯи Институти давлатии кинои Русия Румӣ Шоҳазимов дар озмун ширкат мекунад. Ҳамчунин ба фестивал филмҳои аниматсионии коргардони тоҷик Бахтиёр Қаҳҳоров «Аждар», «Хар», «Мурғак» ва ғайра пешниҳод шудаанд.Дар ин бора корманди масъули Институти «Ҷамъияти Кушода”- Бунёди Мадад дар Тоҷикистон Ҷовид Муқим ба АМИТ “Ховар” иттилоъ дод.