Вазъи иҷтимоию иқтисодии ҷумҳурӣ

Душанбе, 16 октябр. (АМИТ «Ховар», Лаззат Диловарзод).- Маҷмӯаи гузориши ҳармоҳаи Агентии омори назди Президенти кишвар «Дар бораи вазъи иҷтимоию иқтисодии Ҷумҳурии Тоҷикистон» аз чоп баромад.Бояд тазаккур дод, ки гузориши мазкур дар асоси таҳлили маълумоти фаврии воқеӣ, аз ҷумла андозу буҷет, молия, бахшҳои хориҷӣ ва иҷтимоӣ, инчунин иттилооти мухтасар оид ба мамлакатҳои ИДМ-ро низ дар бар гирифтааст. Дар ин гузориши таҳлилӣ ҳамчунин дар асоси таснифоти умумии намудҳои фаъолияти иқтисодӣ (ТУНФӢ), ки бо меъёрҳои байналмиллалии таснифот мувофиқат мекунанд, маълумот дода шудааст.«Сарчашмаҳои асосии иттилоот барои гузориш маълумоти расмие мебошад, ки мақомоти омор аз корхонаҳо, ташкилот ва аҳолӣ бо усули фарогирии пурра ба воситаи тадқиқоти интихобӣ ва дигар шакли мушоҳидаи оморӣ ба даст овардаанд»,- иброз дошт масъули бахши кишоварзӣ, аъзои таҳриряи маҷмӯаи мазкур М.А. Абдуллоев ба мухбири АМИТ «Ховар».Дар гузориш инчунин маълумоти вазорату идораҳои ҷумҳурӣ, ки методологияи мувофиқашуда ва муқоисашаванда будани маълумотро дар сатҳи байналмилалӣ таъмин менамояд, ба ҳисоб гирифта шудааст.Гузориш барои мақомоти идораи давлатӣ, ташкилоти байналмиллалӣ, мутахассисони омор, иқтисод, кормандони илмӣ ва онҳое, ки ба маълумоти оморӣ дар бораи рушди иқтисод, саноат ва кишоварзии Тоҷикистон мароқ доранд, омода гардидааст.