Қонуни Ҷумҳурии Тоҷикистон «Дар бораи муҳоҷирати меҳнатӣ»

Душанбе, 2 ноябр. (АМИТ «Ховар» Ибодат Давлатова).- Дирӯз дар Хадамоти муҳоҷирати назди Ҳукумати Ҷумҳурии Тоҷикистон лоиҳаи Қонуни Ҷумҳури Тоҷикистон «Дар бораи муҳоҷирати меҳнатӣ» бо иштироки намояндаи Дастгоҳи иҷроияи Президенти Ҷумҳурии Тоҷикистон, вазорату идораҳои дахлдори ҷумҳурӣ, созмонҳои байналмилалӣ ва ғайридавлатӣ баррасӣ гардид. Тавре ки ба мухбири АМИТ «Ховар» аз маркази матбуотии Хадамоти муҳоҷират иттилоъ доданд, дар вохӯрӣ сардори Хадамоти муҳоҷират Сафиало Девонаев дар бораи раванди муҳоҷират дар ҷаҳон, истифодаи таҷрибаи кишварҳои пешрафтаи дунё дар бобати муҳоҷирати меҳнатӣ, забономӯзию касбомӯзии муҳоҷирони меҳнатӣ, зери назорати қатъӣ қарор гирифтани муҳоҷирон пеш аз сафар ба хориҷа, пешгирии ноболиғон ҳангоми сафар ба хориҷа, тақвияти омӯзишгоҳҳои касбию техникӣ, дуруст ба роҳ мондани низоми забономӯзию касбомӯзӣ дар тамоми ҷумҳурӣ ва таҳияи қонуни мукаммал, ки фарогирандаи тамоми паҳлуҳои муҳоҷирати меҳнатӣ бошад, таъкид намуд. Инчунин сардори Хадамоти муҳоҷират гуфт: «Муҳоҷирати меҳнатӣ имрӯз дар ҷаҳон ҳамчун мушкилот не, балки чун як раванди оддист, ки аксари давлатҳои ҷаҳонро фаро гирифтааст». Аз тарафи Хадамоти муҳоҷират пешниҳод гардид, ки бо мақсади танзими раванди муҳоҷирати меҳнатӣ ба хориҷа дар лоиҳаи қонун меъёре пешниҳод шавад, ки муҳоҷирони меҳнатӣ ба хориҷа бо мақсади фаъолияти меҳнатӣ бояд танҳо дар асосӣ роҳхати Хадамоти муҳоҷират раванд.