Ҳашт кўчаи пойтахт табдили ном кард

Душанбе, 16 ноябр.(АМИТ «Ховар», Марзия Саидова).-Дар иҷлосияи ёздаҳуми Маҷлиси вакилони халқи шаҳри Душанбе қарорҳои марбута қабул гардиданд, ки тибқи онҳо ҳашт кўча дар пойтахт табдили ном кард.  Аз ҷумла, кўчаи Интернатсионалная ба номи ходими намоёни давлатӣ, раиси Маҷлиси Олии Ҷумҳурии Тоҷикистон Сафаралӣ Раҷабов, кўчаи Бауман ба номи Президенти Академияи илмҳои РСС Тоҷикистон Султон Умаров, кўчаи Проектная ба номи Президенти Академияи илмҳои РСС Тоҷикистон Муҳаммад Осимӣ, кўчаи Железняк ба номи Ҳофизи халқии РСС Тоҷикистон Ҳикмат Ризо, кўчаи Ватутин ба номи Ходими хизматнишондодаи санъати Тоҷикистон Хайрулло Абдуллоев, кўчаи Сеченов ба номи Ходими хизматнишондодаи санъати Тоҷикистон Дамир Дўстмуҳаммадов, кўчаи Фурманов ба номи Ходими хизматнишондодаи санъати Тоҷикистон Фаттоҳ Одинаев ва кўчаи Шўраксой ба номи вакили Маҷлиси вакилони халқи шаҳри Душанбе Исомиддин Соатов номгузорӣ шуданд. Ин иқдом бо мақсади абадӣ гардонидани хотираи неки шахсиятҳои шинохта ва тозаю беолоиш нигоҳ доштани забони давлатӣ амалӣ шудааст.