Духтарони ғоратгар

Душанбе, 30 ноябр. (АМИТ «Ховар», Фарзона Достонзод.)- 2 зан- сокинони кӯчаи Какановичи ноҳияи Ҳисор аз ҷониби кормандони милитсия ҳамчун гумонбар дар ғоратгарӣ дастгир шуданд. Тавре ки сомонаи ВКД хабар дод, ба ШВКД ноҳияи Ҳисор аз номи хазинадори маъмурияти мактаби таҳсилоти умумии №61-и ҳамин ноҳия Тошпӯлотов Бобоназар Эгамбердиевич, соли таваллудаш 1965 ариза ворид гардид. Бобоназаров тасдиқ намуд, ки рӯзи 28 ноябр аз «Амонатбонк»-и №10-и ноҳияи Ҳисор дар асоси чеки пулӣ барои пардохти маоши кормандони мактаби мазкур 19 хазору 127 сомонӣ гирифтааст. Тавре ки дар ариза омадааст, худи ҳамон рӯз дар бозори марказии шаҳри Ҳисор ба тариқи зӯроварӣ 2 нафар зан пулҳои дар дохили селофан бударо гирифта, аз ҷойи ҳодиса ғайб задаанд.Хангоми гузаронидани чораҳои фаврию ҷустуҷӯӣ шаҳрвандон Шаҳноза Каримова, соли таваллудаш 1990 ва Ситора Исмоилова, соли таваллудаш 1989 дастгир шуданд. Аз рӯи ин ҳодиса парвандаи ҷиноӣ оғоз гардида, тафтиш идома дорад.