Омодагӣ ба истиқболи Иҷлосияи тақдирсоз

Душанбе, 9 ноябр. (АМИТ «Ховар», Дилшодаи Хайруллоҳ) -Дирӯз дар ҳузури Сарвазири Ҷумҳурии Тоҷикистон Оқил Оқилов ҷаласаи навбатии Кумитаи тадорукот оид ба таҷлили 20-солагии Иҷлосияи таърихии 16-уми Шӯрои Олии Ҷумҳурии Тоҷикистон баргузор гардид. Сарвазири мамлакат Оқил Оқилов оид ба рафти омодагиҳо ба таҷлили ин санаи таърихии миллати тоҷик ва иҷрои нақшаи чорабиниҳое, ки ба ин мақсад равона шудаанд, изҳори назар кард ва таъкид дошт, ки рафти омодагиҳо дар айни замон мувофиқи матлаб ба роҳ монда шуда, тадбирҳои тайёрӣ ба истиқболи ин сана бо маром идома доранд. Тавре ки таъкид гардид, ба истиқболи 20-солагии Иҷлосияи таърихии 16-уми Шӯрои Олии Ҷумҳурии Тоҷикистон дар ҳама шаҳру ноҳияҳои мамлакат ташкили чорабиниҳои оммавию фарҳангӣ ва сохтмону ба итмом расонии як зумра иншооти ҷашнӣ ба нақша гирифта шудааст, ки иҷроиши онҳо то рӯзи таҷлили ин санаи тахрихӣ таъмин карда мешавад. Оқил Оқилов роҳбарони вазорату идораҳои дахлдор ва дигар шахсони масъулро вазифадор кард, ки ҷиҳати дар кӯтоҳтарин мӯҳлат анҷом додани корҳои омодагӣ ва ташкили чорабиниҳои оммавию фарҳангӣ тадбирҳои амалӣ андешида, ҷараёни корҳои ободонию оришии мавзеъҳои баргузории чорабиниҳои идонаро вусъат бахшанд.