Стратегияи баландбардории некӯаҳволии мардуми Тоҷикистон

Душанбе, 22 ноябр. (АМИТ «Ховар», Ибодат Давлатова).- Дирӯз дар Вазорати рушди иқтисод ва савдо ҷаласаи Гурӯҳи кории ҳамоҳангсоз дар назди Котиботи Шӯрои миллии рушд бо иштироки намояндагони вазорату идораҳои дахлдор баргузор гардид, ки дар он Стратегияи баландбардории некӯаҳволии мардуми Тоҷикистон барои солҳои 2013-2015 дар доираи Стратегияи миллии рушди Ҷумҳурии Тоҷикистон барои давраи то соли 2015 мавриди муҳокимаи ниҳоӣ қарор гирифт. Тавре ба мухбири АМИТ «Ховар» аз маркази матбуотии Вазорати рушди иқтисод ва савдои Ҷумҳурии Тоҷикистон иттилоъ доданд, Муовини Вазири рушди иқтисод ва савдо, муовини роҳбари Гурӯҳи кории ҳамоҳангсоз Умед Давлатзод «Стратегияи баландбардории некӯаҳволии мардуми Тоҷикистон барои солҳои 2013-2015»-ро муаррифӣ карда, дар ибтидо ҳадафҳои асосии онро зикр намуд, ки онҳо аз идома додани раванди коҳиши сатҳи камбизоатӣ ва фароҳам овардани шароити мусоид барои устуворгардонӣ ва афзоиши теъдоди табақаи миёна мебошанд. Дар ҷараёни муаррифии Стратегияи мазкур ҳамзамон қайд гардид, ки тибқи сенарияи эҳтимолӣ сатҳи камбизоатӣ аз 38,3% соли 2012 то ба 31,5% дар соли 2015 коҳиш ёфта, сатҳи табақаи миёна (тибқи меъёри байналмилалӣ) мутаносибан аз 19,5% то ба 29,4% расонида мешавад.