Тавсияҳои Пажуҳишгоҳи боғдорию сабзавоткорӣ

Душанбе, 21 ноябр. (АМИТ «Ховар», Лаззат Диловарзод).-Бо қарори Комиссияи озмоишии навъи зироатҳои кишоварзӣ ва муҳофизати навъҳои Вазорати кишоварзии ҷумҳурӣ, пиёзи навъи «Ҳисорӣ» ва ду навъи картошка- «Дӯстӣ» ва «Файзобод» барои санҷиши васеъ дар истеҳсолот тавсия дода шуд,-иттилоъ доданд аз Пажухишгоҳи боғдорию сабзавоткории Академияи илмҳои кишоварзии Тоҷикистон ба мухбири АМИТ «Ховар».Ба иттилои манбаъ, пажуҳишгоҳи мазкур барои санҷиши расмӣ навъҳои нави картошкаи «Овчӣ» ва «Нуринисо»-ро қабул намуд.Ҳоло дар озмоишгоҳи ин пажуҳишгоҳ се навъи қаламфури тез, як навъи лӯбиёи чинӣ, ду навъи боимҷон ва се навъи картошка барои пешниҳод ба комиссияи давлатӣ омода шудаанд.Дар пажуҳишгоҳ 25 навъи картошкаи селексияи олмонӣ, фаронсавӣ ва русӣ пурра гардонида шуда, дар ноҳияҳои Ҷиргатол ва Ғончӣ мавриди афзоишдиҳӣ қарор дода шудаанд.