Баррасии саломатии репродуктивӣ, ҷинсӣ ва ҳуқуқии занони мубталои ВНМО

Душанбе, 5 декабр. (АМИТ «Ховар» Зарангез Латифова).- Рӯзҳои 5-ум 6-уми декабри соли ҷорӣ дар меҳмонхонаи «Серена»-и шаҳри Душанбе Анҷумани минтақавии «Саломатии репродуктивӣ, ҷинсӣ ва ҳуқуқии занони мубталои Вируси норасоии масъунияти одам (ВНМО) дар кишварҳои Осиёи Марказӣ баргузор мегардад. Ҳадафи баргузории Анҷуман ҷалби сиёсатшиносони касбие мебошад, ки қобилияти қабул намудани қарорҳоро дар боби ҳалли мушкилоти занони мубталои ВНМО доранд ва оид ба масъалахои гендерии марбут ба ВНМО тавсияҳои умумӣ таҳия менамоянд, ки ин коркардҳо дар мустаҳкам намудани чораҳои ҷавобӣ алайҳи паҳншавии ВНМО мусоидат менамоянд. Анҷумани мазкур аз ҷониби Кумитаи Миллии ҳамоҳангсозии пешгирӣ ва мубориза алайҳи бемориҳои ВНМО, БПНМ, сил ва табларза дар ҷумҳурии Тоҷикистон, Вазорати тандурустии ҷумҳурии Тоҷикистон ва Кумитаи кор бо занон ва оилаи назди ҳукумати ҷумҳурии Тоҷикистон ва Шабакаи тоҷикистонии занони мубталои ВНМО баргузор мегардад. Дар он намояндагони ташкилотҳои занони мубталои ВНМО аз Тоҷикистон, қазоқистон, қирғизистон, Русия, Украина ва Ўзбекистон ширкат мекунанд. Фаъолияти анҷуман барои дастгирии ҳуқуқии бонувон дар соҳаи саломатии репродуктивию ҷинсӣ, кафолати дастрасии баробар доштани занону духтарон ба тадбирҳои эҳтиётӣ, табобату нигоҳубини марбут ба масъалаҳои ВНМО БПНМ, инчунин дастгирии гуруҳҳои бештар ба хавфи сироят дучоршаванда равона мешавад. Анҷуман барои паст кардани ҳолатҳои поймолкунии ҳуқуқ ва зўроварӣ нисбат ба занон, доғдоркунӣ дар масъалаи ВНМО, БПНМ ва ворид намудани масъалаҳои гендерӣ дар барномаҳои миллии мубориза бо ВНМО дар кишварҳои минтақа мусоидат мекунад.