Дашти Сижд обод мешавад

Хоруғ, 25 декабр. (АМИТ «Ховар», Л.Додо). – Дашти Сижд яке аз мавзеъҳои калонтарини ноҳияи Шуғнон маҳсуб меёбаду аз сабаби норасоии оби полезӣ солҳо боз мавриди баҳрабардорӣ қарор надошт. Вазъияти мазкурро ба инобат гирифта, Ҳукумати ҷумҳурӣ, мақомоти маҳаллии ҳокимияти давлатии вилоят «Барномаи давлатии азхудкунии заминҳои нав»-ро дар ин мавзеъ роҳандозӣ намуд. Ҳоло корҳои ҳамворкунӣ ва сохтмони канали Сижд идома дорад. Тавре ки муовини сардори хоҷагии оби ноҳияи Шуғнон Амиршо Шаҳбодов иброз дошт, канали Сижд бо дарозиии 5 километр бунёд ёфта, аллакай корҳои сохтмонӣ ва ҳамворкунӣ дар масофаи 1,5 километр ба анҷом расидаанд. Барои интиқол додани об аз канал қубурҳои диаметрашон 800 см васл карда мешаванд. Коршиносон бар онанд, ки дар сурати пурра азхуд гардидани заминҳои дасши Сижд аҳолии зиёди минтақаи куҳистон бо ҷойи кори доимӣ таъмин гардида, вазъи иҷтимоии аҳолӣ беҳтар мегардад.