Интихоби раиси нав дар АЖРВТ

Душанбе, 24 декабр (АМИТ «Ховар»).- Нарзулло Латифов, шореҳи маъруфи варзиш бори дигар раиси Ташкилоти ҷамъиятии “Ассотсиатсияи хабарнигорони риштаи варзиши Тоҷикистон» (ТҶ АЖРВТ) интихоб шуд. Ба тарафдории ӯ вакилони конфронси ҳисоботию интихоботии ТҶ АЖРВТ, ки 22-юми декабр дар шаҳри Душанбе баргузор гардид, якдилона раъй доданд. Нарзулло Латифов, ки поягузори Ассотсиатсияи хабарнигорони риштаи варзиши Тоҷикистон мебошад, то соли 2017-ум вазифаи раисии ин ташкилотро ба ӯҳда хоҳад дошт. Дар ин конфронс Муҳаммадшо Абдуллоев ва Абубакр Азизхоҷаев ноибони раис, Фарид Солеҳов дабири кулли ТҶ АЖРВТ интихоб шуданд. Вакилони конфронс инчунин аъзои кумитаи иҷроия ва комиссияи тафтишотии ТҶ АЖРВТ-ро интихоб карданд.Бояд гуфт, ки ТҶ АЖРВТ аз моҳи марти соли 2011-ум ба узвияти AIPS (International Sports Press Association) — Ассотсиатсияи байналмилалии матбуоти варзишӣ пазируфта шудааст. Дар айни ҳол иттиҳодияҳои миллии хабарнигорони варзишии 154 кишвари ҷаҳон аъзои AIPS мебошанд. Н. Латифов муътақид бар он аст, ки ҳадафи аслии ТҶ АЖРВТ — рушди журналистикаи варзишӣ, тарғиби тарбияи ҷисмонӣ, варзиш ва тарзи ҳаёти солим мебошад. Инчунин Ассотсиатсия ба баландшавии савия ва дараҷаи касбии хабарнигорони варзишии кишвар мусоидат мекунад.