Новосибирск: вохӯрӣ бо қаннодони тоҷик

Душанбе, 3 декабр. (АМИТ «Ховар», Ибодат Давлатова).-Дар шаҳри Новосибирски Федератсияи Русия вохӯрии корманди Намояндагии Хадамоти муҳоҷирати назди Ҳукумати Ҷумҳурии Тоҷикистон дар ФР бо роҳбари сехи қаннодии «Дамские пальчики» Сайфиддин Абдуллоев баргузор гардид.Тавре ки ба мухбири АМИТ «Ховар» аз хадамоти мазкур иттилоъ доданд, дар ҷараёни мулоқот С. Абдуллоев иттилоъ дод, ки корхонаи онҳо аз соли 2010 фаъолият менамояд ва дар айни замон шумораи коргарон ба 16 нафар расидааст, ки ҳамаи онҳо шаҳрвандони ҶТ мебошанд.Бояд гуфт, ки аз ҷониби корхона қаннодони тоҷик бо ҷои хоб, се маҳал хӯрок ва ҳуҷҷатҳои лозимӣ барои кор таъмин шудаанд. Зимни суҳбат бо коргарон маълум шуд, ки дар ин ҷо навъҳои гуногуни маҳсулоти қаннодии болаззат бо сифати хуб таҳия мешавад. Маоши моҳонаи коргарон аз 15 то 21 ҳазор рублро ташкил медиҳад. Иттилоъ дода мешавад, ки дар семоҳаи аввали соли 2013 ҷалби боз 15 нафар коргар аз ҳисоби шаҳрвандони Тоҷикистон дар шаҳрҳои Ленино –Кузнетски вилояти Кемерово ва Барнаули кишвари Олтой ба нақша гирифта шудааст, гуфт манбаъ.