Таҷҳизи озмоишгоҳҳои «Тоҷикстандарт» бо асбобҳои метрологии нав

Душанбе, 12 декабр. (АМИТ «Ховар», Бекназари Абӯбакр). — Дирўз дар Агентии «Тоҷикстандарт» таҳти унвони «Таъминоти метрологии воситаҳои ченак дар соҳаи энергетика» семинари омӯзишӣ доир гардид, ки дар он мутахассисони Ҷумҳурии Лаҳистон бо мутахассисони соҳаи барқ ва озмоишгоҳи метрологии «Тоҷикстандарт» дар масоили навгониҳои соҳа табодули назар карданд. Аз «Тоҷикстандарт» ба АМИТ «Ховар» иттилоъ доданд, ки ин семинар бо мақсади татбиқи Қарори Ҳукумати Ҷумҳурии Тоҷикистон «Дар бораи барномаи давлатии сифат барои солҳои 2013-2015» ва ҷиҳати ҳамоҳангсозии стандартҳои миллӣ ба стандартҳои байналмилаливу аврупоӣ, ки аз талабҳои асосии Созмони Ҷаҳонии Савдо оид ба монеаҳои техникӣ дар савдо аст, инчунин таҷҳизи озмоишгоҳҳои санҷишӣ бо асбобҳои ченкунии самаранокии энергетикии асбобҳои барқию маишӣ роҳандозӣ шуд. Дар семинар чанд номгӯй асбоби метрологии нави ҷавобгўй ба талаботи стандартҳои байналмилалӣ ва аврупоӣ, ки озмоишгоҳҳои метрологии «Тоҷикстандарт» бо онҳо ҷиҳозонида мешаванд, муаррифӣ гардид.