Тадбири нави Бонки рушди АвруОсиё

Душанбе, 24 декабр. (АМИТ «Ховар», Покиза Маҳмадбекова). – Бонки рушди АвруОсиё ба манзури густариши барномаҳояш созишномаи нави қарздиҳиро имзо намуд. Тавре ки аз намояндагии бонки мазкур дар Тоҷикистон ба АМИТ «Ховар» хабар доданд, мутобиқи ин созишнома барои қарздиҳӣ 40 миллион доллари ИМА ҷудо карда мешавад. Маблағҳои зикршуда барои ниҳодҳои қарздиҳандаи бонки мазкур ҷиҳати дастгирии тиҷорати хурду миёна, сарфаи нерӯи барқ, ҳамчунин барои татбиқи лоиҳаҳои бахши кишоварзию саноат пешбинӣ шудаанд. Бонки рушди АвруОсиё созмони молиявии ҷаҳонӣ ба шумор меравад, ки онро Русия ва Қазоқистон моҳи январи соли 2006 бо мақсади мусоидат ба рушди иқтисоди бозаргонии давлатҳои аъзои Иттиҳод, рушди устувори иқтисодии онҳо ва густариши равобити тиҷоратию иқтисодӣ таъсис дода буданд.Ҷумҳурии Арманистон, Ҷумҳурии Беларус, Ҷумҳурии Қазоқистон, Ҷумҳурии Қирғизистон, Федератсияи Русия ва Ҷумҳурии Тоҷикистон аъзои бонк мебошанд.