Туҳфа ба Китобхонаи миллии Тоҷикистон

Душанбе, 19 декабр (АМИТ «Ховар», Музаффари Рустам) — 19 декабри соли 2012 шуъбаи Ташкилоти байналмилалии Институти «Ҷамъияти Кушода» — Бунёди Мадад дар Тоҷикистон ба Китобхонаи миллии Тоҷикистон 437 нусха китоби гуногунро ба маблағи умумии 37238 сомонӣ туҳфа кард. Дар миёни китобҳои туҳфашуда асарҳои адибони машҳури ҷаҳон, ба мисли Э. Хеменгуэй — «Алвидоъ силоҳ», «Колоннаи панҷум», «Мӯйсафед ва баҳр», Ҷек Лондон — «Мартин Иден», Л. Н. Толстой — «Ҷанг ва сулҳ», Теодор Драйзер — «Фоҷиаи амрикоӣ», Вилям Шекспир «Фоҷиаҳо», М. Горкий — «Модар», М. А. Шолохов — «Дони ором», С. Айнӣ — «Ғуломон» ҳастанд. Ҳамчунин ба Китобхонаи миллӣ китобҳо оид ба санъат, таърих, бостоншиносӣ ва мардумшиносии Тоҷикистон эҳдо шуданд. Китобҳои мазкур аз хазинаи ашхоси алоҳида харидорӣ шуда ва дар ҳолати хуб қарор доранд.