Ҳаҷми нерӯи барқ дар соли 2012 зиёд шуд

Душанбе, 30 январ. (АМИТ «Ховар», Ибодат Давлатова).- Ҳаҷми истеҳсоли нерӯи барқ дар соли 2012 нисбат ба соли 2011 ба миқдори 524 млн.кВт.соат зиёд шуд, зикр гардид дар нишасти матбуотии Ширкати саҳҳомии холдингии кушодаи «Барқи Тоҷик».  Инчунин гуфта шуд, ки бо назардошти маҳдуд будани имконияти воридоти нерӯи барқ аз хориҷи ҷумҳурӣ, ширкати «Барқи Тоҷик» дар соли 2012 хариди нерӯи барқро асосан аз ҶСК «НБО-и Сангтӯда-1» ва «НБО-и Сангтӯда-2» амалӣ намудааст, ки ин барои то қадри имкон кам намудани норасоии барқ дар фасли зимистон мусоидат менамояд.Илова бар ин дар соли 2012 интиқоли нерӯи барқ ба ширкати «Помирэнерҷӣ» 15,4 млн.кВт.соатро ташкил дод, ки ин нисбат ба соли 2011 дар ҳаҷми 3,5 млн.кВт.соат зиёд мебошад. Ин кор дар фаслҳои баҳору тобистон, ки барқи зиёдатӣ мавҷуд буд, амалӣ гаштааст.