Дастури Путин оид ба будубоши муҳоҷирони тоҷик дар Русия

Душанбе, 24 январ. (АМИТ «Ховар», Музаффар Рустамов).-Президенти Русия ба Хадамоти федералии муҳоҷират дастур дод, ки Созишнома дар бораи будубоши шаҳрвандони Ҷумҳурии Тоҷикистон дар Федератсияи Русияро ба имзо расонанд. Ҳуҷҷати мазкур 21 январи соли ҷорӣ дар сомонаи расмии маълумотҳои ҳуқуқӣ ҷой дода шудааст. Ба иттилои сардори шуъбаи робита бо ҷомеаи Хадамоти муҳоҷирати назди Ҳукумати ҶТ Абдуллоҳи Қодирӣ дар ҳуҷҷат омадааст, ки шаҳрвандони Ҷумҳурии Тоҷикистон, ки камтар аз 15 рӯз дар ҳудуди ФР қарор доранд, метавонанд худро дар қайди мақомот нагузоранд. Созишнома то муҳлати номуайян баста мешавад. Лозим ба ёдоварист, ки моҳи октябри соли гузашта Владимир Путин бо сафари корӣ ба Тоҷикистон ташриф оварда, бо Президенти кишвар Эмомалӣ Раҳмон мулоқот намуд. Дар натиҷаи ин мулоқот тарафҳо ба мувофиқа омаданд, ки ба муҳоҷирон-шаҳрвандони тоҷик, ки дар ҳудуди ФР фаъолият доранд, иҷозатномаи кор ба муддати 3 сол дода шавад.