Паррандагон-дӯстони мо

Кӯлоб, 26 январ. (АМИТ «Ховар», С.Холов). – Дар ноҳияҳои Фархор ва Ҳамадонӣ бо мақсади ҳифзу нигоҳдошти ҳайвоноти ваҳшӣ ва паррандагони дастӣ дар фасли зимистон дар мавзеъҳои ҷамъшавии онҳо аз ҷониби кормандони бахши ҳифзи муҳити зист ва сокинон як миқдор дону кунҷора ва дигар намуди хӯрокӣ дастрас гардид. Кормандони бахши ҳифзи муҳити зисти ноҳияи Фархор барои аз талафёбӣ эмин доштани ҳайвоноту паррандагон имрӯзҳо дар соҳили дарёи Панҷ -дар мавзеъҳои Кокул ва мавзеи Сайёд корҳои биотехникиро анҷом медиҳанд. Барои ҳифзи боигариҳои табиӣ чунин чорабиниҳо аз ҷониби кормандони шуъбаи ҳифзи муҳити зисти ноҳияи Мир Сайид Алии Ҳамадонӣ низ амалӣ мешаванд. Кормандони соҳа дар дигар шаҳру навоҳии минтақаи Кӯлоби вилояти Хатлон низ аз ҳисоби мутахассисон ва ҷалби сокинони деҳот гуруҳҳои корӣ созмон дода, ният доранд, ки то фарорасии мавсими баҳор дар рӯзҳои сарди фасли зимистон ҳайвоноту паррандагонро дар мавзеъҳои куҳдоман бо маводи хӯрокӣ ба қадри кофӣ таъмин намоянд.