Прокуратураи генералӣ барои истирдоди У.Қувватов дархост ирсол намуд

Душанбе, 9 январ. (АМИТ «Ховар», Лутфия Эшонқулова). – Прокуратураи генералии ҶТ ба АМА(Аморати муттаҳидаи Араб) барои истирдоди Умаралӣ Қувватов дархост ирсол намуд. Дар ин бора 9 январ дар нишасти матбуотӣ Прокурори генералии Тоҷикистон Шерхон Салимзода изҳори назар кард. Тибқи суханони ӯ, соҳибкори собиқ, пешвои мухолифини ҷунбиши «Гуруҳи 24» У.Қувватов аз рӯи якчанд ҷиноят гунаҳкор карда мешавад ва нисбати ба ӯ аз ҷониби Агентии назорати давлатии молиявӣ ва мубориза бо коррупсияи ҶТ парвандаи ҷиноӣ кушода шудааст. «Дар робита ба ин, 23 декабр ӯ дар Дубай дастгир шуд ва мо ба ҳамкоронамон ба АМА дархости боздоди ӯро ирсол намудем» — гуфт Ш.Салимзода. Прокурори генералии кишвар зикр намуд, ки дар соли 2012 тақрибан 150 узви созмонҳои гуногуни террористӣ, динӣ ва ифротгароӣ дастгир шуданд. Теъдоди зиёди дастгиршудагон аъзои созмони ифротгарои «Ҳизб-ут-таҳрир» маҳсуб меёбанд. Дар соли гузашта 14 парвандаи ҷиноӣ нисбат ба 36 аъзои ин созмони мамнӯъ кушода шуда буд. Дар маҷмӯъ 1 парвандаи ҷиноӣ нисбат ба 7 намояндаи «Ҷамоати таблиғ» ва 14 парвандаи ҷиноӣ нисбат ба 76 аъзои гуруҳи «Ҳақиқати исломии Туркистон» кушода шудааст.