Содироти маҳсулоти кишоварзӣ афзуд

Душанбе, 18 январ. (АМИТ «Ховар», Покиза Маҳмадбекова). – Дар соли 2012 ба хориҷи кишвар зиёда аз 8021,1 тонна молу маҳсулоти кишоварзӣ содирот шуд, ки ин нишондиҳанда нисбат ба соли 2011 қариб 2102,2 тонна зиёд аст.. Зимни нишасти матбуотӣ раиси Иттифоқи «Тоҷикматлубот» Сироҷиддин Валиев иброз дошт, ки дар соли сипаригашта ба Федератсияи Русия 3 ҳазору 954,8 тонна пиёз, 430 тонна мева, 130 тонна меваи хушк содирот гардид. Инчунин дар ин давра ба Афғонистон, Қазоқистон ва Қирғизистон маҳсулоти кишоварзӣ содирот шуд. «Мо ният дорем, ки дар соли 2013 ҳаҷми содироти маҳсулоти кишоварзӣ ва саноатиро ба дигар давлатҳо зиёд ба роҳ монем ва шарикони боэътимоди худро пайдо кунем», — афзуд С. Валиев. Иттифоқи Тоҷикматлубот дар соли 2012 ба воситаи ярмаркаҳои фурӯши маҳсулоти кишоварзӣ қариб 1,5 ҳазор тонна маҳсулот ба сокинони ҷумҳурӣ бо нархи нисбат ба бозор арзонтар пешкаш намуд.