Баррасии барномаи рушди кишоварзӣ

Душанбе, 22 феврал. (АМИТ «Ховар», Дилшодаи Хайруллоҳ). – Дар шаҳри Душанбе мулоқоти вазири кишоварзии Ҷумҳурии Тоҷикистон Қосим Қосимов ва роҳбари шӯъбаи татбиқи барномаҳо, ҳамоҳангсози минтақавии Маркази байналмилалии таҳқиқи кишоварзӣ дар минтақаҳои хушк Ҷозеф Турок баргузор гардид. Тавре ки аз Вазорати кишоварзии ҶТ ба мухбири АМИТ «Ховар» хабар доданд, дар ҷараёни мулоқот масоили хамкории дуҷонибаи Академияи илмҳои кишоварзии Тоҷикистон ва Маркази байналмилалии таҳқиқи кишоварзӣ дар минтақаҳои хушк мавриди баррасӣ қарор гирифтанд.«Вазорати кишоварзӣ бо назардошти зарурати ҳалли амнияти маводи ғизоӣ дар ҷумҳурӣ, ҳамчунин тағйир ёфтани иқлими сайёра «Барномаи ислоҳоти бахши кишоварзии ҶТ барои давраи солҳои 2012 — 2020» -ро тарҳрезӣ намуд, ки дар он бархе афзалиятҳои рушди кишоварзӣ барои солҳои наздиктарин муайян шудааст», — гуфт Қосим Қосимов. Ба манзури пурзӯр намудани иқтидори содиротии Ҷумҳурии Тоҷикистон Барномаи рушди боғдорию токпарварӣ қабул шудааст, зеро Тоҷикистон ба технологияҳои нави парвариш ва коркарди меваҷот зарурат дорад. Қобили зикр аст, ки Вазорати кишоварзии ҷумҳурӣ тайи шаш сол якҷоя бо Маркази байналмилалии таҳқиқи кишоварзӣ дар минтақаҳои хушк лоиҳаҳои «Беҳдошти сатҳи зиндагӣ дар Хатлон» ва «Афзун намудани даромади аҳолӣ ва занони деҳот бо усули ташкили коркарди пӯсту пашм» — ро дар амал татбиқ намуда, алҳол татбиқи лоиҳаҳои дигар дар назар аст.