Бонки ҷаҳонӣ ба Тоҷикистон 18 миллион доллар ихтисос медиҳад

Душанбе, 7 феврал. (АМИТ «Ховар»).- Имрӯз «Бонки ҷаҳонӣ» дар робита ба маблағгузориаш ба «Лоиҳаи ислоҳоти маъмурикунонии андоз» изҳороти расмӣ дод. Гуфта шуд ин маблағ ба миқдори 18 миллион доллари амрикоӣ буда, чун грант ихтисос дода мешавад. Марша Олив, роҳбари намояндагии «Бонки ҷаҳонӣ» дар Тоҷикистон гуфт, ин қарзи бебозгашт барои татбиқи лоиҳаи ислоҳоти маъмурикунонии андоз дар Тоҷикистон аст ва барои низоми самараноки системаҳои андоз равона шудааст. Номбурда яке аз ҳадафҳои аслии ин изҳоротро таъсиси системаи андози боз ҳам шаффоф,оқилона ва самаранок донист ва гуфт, он барои муассисаҳои дохилӣ ва андозсупорандагони мустақил фоида меоварад.