«Истиқлол» ба Кувайт меравад

Душанбе, 25 феврал. (АМИТ «Ховар»). — Қаҳрамони дукаратаи кишвар оид ба футбол дастаи «Истиқлол» — и шаҳри Душанбе дар ҳошияи омодагӣ ба мусобиқоти Тоҷикистон дар соли 2013 машқҳои минбаъдаашро дар Кувайт мегузаронад. Дар ин бора президенти дастаи «Истиқлол» Шоҳрух Саидов дар сомонаи расмии клуби мазкур хабар дод. Мувофиқи суханони Шоҳрух Саидов, футболбозони дастаи «Истиқлол» баъди анҷоми мусобиқоти интихобӣ барои дарёфти Ҷоми Конфедератсияи футболи Осиё дар шаҳри Бишкек ҳамоно ба Кувайт мераванд. Шоҳрух Саидов ҳамчунин зикр намуд, ки ҷамъомади даҳрӯзаи таълимию тамринӣ аз 25 март то 5 апрел сурат мегиранд. Дар ин давра дастаи «Истиқлол» бо ду клуби футболи Кувайт вомехӯрад.