Мулоқоти И. Сатторов бо намояндагони Намоишгоҳи китоби Франкфурт

Душанбе, 5 феврал. (АМИТ «Ховар»).- Чанд рӯз қабл Сафири Фавқулодда ва Мухтори Ҷумҳурии Тоҷикистон дар Ҷумҳурии Федеративии Олмон Имомудин Сатторов бо муовини президенти Намоишгоҳи байналмилалии китоби Франкфурт Тобиас Фосс ва Роҳбари бахши ташкилии ин идора Купска мулоқот намуд. Зимни суҳбат сафири Тоҷикистон оид ба вазъи табъу нашри китобҳо, дастовардҳои илмиву фарҳангӣ баъд аз соҳибистиқлолии Тоҷикистон ва ҳамкориҳои муваффақонаи фарҳангии Тоҷикистону Олмон иттилоъ дод. Т. Фосс қайд кард, ки Намоишгоҳи китоби Франкфурт (Frankfurter Buchmesse) яке аз бузургтарин намоишгоҳҳои китоби байналмилалӣ маҳсуб ёфта, ҳар сол як маротиба гузаронида мешавад. Дар намоишгоҳ зиёда аз 7400 нашриёту чопхона аз 100 кишвари ҷаҳон ширкат меварзад. Иштирок дар ин намоишгоҳ ба ширкаткунандагон ҷиҳати муаррифии китобҳо, ба роҳ мондани робитаҳои корӣ бо ширкатҳои нашр ва паҳнкунандаи китобу маҷаллаҳо, корхонаҳои истеҳсолкунандаи дастгоҳҳои муосири чопкунӣ, табодули малака бо мутахассисони соҳа, инчунин муаррифии дастовардҳои илмиву фарҳангии кишварҳо имкониятҳои беҳтаринро фароҳам меоварад. Дар ин бора ба АМИТ «Ховар»аз Раёсати иттилоот, матбуот, таҳлил ва тарҳрезии ВКХ ҶТ хабар доданд.