Намояндаи ҳизби аграрӣ тарки курсӣ кард

Душанбе, 27 феврал.( АМИТ «Ховар», Марзия Саидова).-Ваколати вакили Маҷлиси намояндагон, намояндаи ҳизби аграрии кишвар дар парлумон Рустам Латипов имрӯз бо қарори палатаи поёнии парлумони мамлакат пеш аз муҳлат қатъ шуд.Ҳамзамон ӯро аз ҳайати кумитаи Маҷлиси намояндагони Маҷлиси Олии Ҷумҳурии Тоҷикистон оид ба масъалаҳои аграрӣ ва экология ва аз ҳайати Комиссияи Маҷлиси намояндагон оид ба назорати дастур ва ташкили кор бароварданд. Дар як вақт Рустам Латиповро инчунин аз вазифаи роҳбари Комиссияи муваққатии экологии Маҷлиси намояндагони Маҷлиси Олии Ҷумҳурии Тоҷикистон озод карданд. Мавсуф чанде пеш бо Фармони Президенти Ҷумҳурии Тоҷикистон Эмомалӣ Раҳмон иҷрокунандаи вазифаи раиси ноҳияи Восеи вилояти Хатлон таъйин гашта буд. Шукурҷон Зуҳуров-раиси Маҷлиси намояндагон ба Р. Латипов барои фаъолияти пурмаҳсул дар бахши таҳия ва қабули қонуну санадҳо дар парлумони мамлакат изҳори сипос намуд.