Тағйиру иловаҳо ба қонунгузориҳои нави Федератсияи Русия

Душанбе, 27 феврал. (АМИТ «Ховар», Ибодат Давлатова).-Имрӯз дар Хадамоти муҳоҷирати назди Ҳукумати Ҷумҳурии Тоҷикистон оид ба ворид намудани тағйиру иловаҳо ба қонунгузориҳои нави Федератсияи Русия оид ба будубоши муҳоҷирони меҳнатӣ, шаҳрвандони хориҷӣ дар ин кишвар нишасти матбуотӣ баргузор гардид.Муовини сардори Хадамоти муҳоҷират Саидғуфрони Абдулло зикр намуд, ки дар давоми соли 2012 аз ҷониби Думаи давлатии Федератсияи Русия як қатор қонуну қарорҳои дахлдор дар самти муҳоҷират қабул гардида, аз аввали соли 2013 мавриди амал қарор дода шуданд.Мутобиқи талаботи қонуни федералӣ аз 30 декабри соли 2012 «Оид ба дохил намудани тағйироту иловаҳо ба моддаи 26 қонуни федералӣ», «Оид ба тартиби воридшавӣ ба Федератсияи Русия ва баромад аз Федератсия Русия» шаҳрвандони хориҷие, ки қаблан дар давраи будубоши худ дар ҳудуди Федератсияи Русия қонунгузории онро риоя накардаанд, воридшавии онҳо ба ин кишвар то муддати 3 сол манъ шудааст. Яъне, агар шаҳрванди хориҷӣ, ки бо мақсади фаъолияти меҳнатӣ ба Федератсияи Русия ворид шуда, дар мақомоти минтақавии Хадамоти федералии муҳоҷирати Русия худро ба қайди муҳоҷират гузоштааст, лекин дар муддати се моҳ 90 рӯз барои амалӣ намудани фаъолияти меҳнатӣ- иҷозатномаи корӣ ё патент нагирифтааст, ба истиснои ҳолатҳои табобати оҷилӣ, бемории вазнин, ё ин, ки марги хешу табори наздик, истиқоматкунандаи Федератсияи Русия, ё дар ҳолатҳои дигар вобаста ба офатҳои табиӣ, ки имконияти баромадан аз ҳудуди Федератсияи Русияро надошта бошад, бояд дар муддати 30 шабонарӯз қаламрави ин кишварро тарк кунад. Дар сурати берун нашудан аз қаламрави Федератсияи Русия, шаҳрванди хориҷӣ вайронкунандаи қонунгузории муҳоҷирати Русия ба ҳисоб меравад ва он дар махзани маълумоти умумӣ ва пеш аз ҳама дар нуқтаҳои гузаргоҳҳои сарҳадӣ дарҷ мешавад.