Телевизионҳои мустақил ҳам ба пахши рақамӣ мегузаранд?

Душанбе, 6 феврал. (АМИТ «Ховар», Сарвинози Руҳуллоҳ) – Рўзи 9 феврал дар шаҳри Хуҷанд тақдири телевизионҳои мустақил ҳангоми гузариш ба пахши рақамӣ дар меҳвари гуфтугўи роҳбарони телевизион ва радиоҳои мустақили кишвар қарор мегирад. Дар ин бора ба АМИТ «Ховар» аз Ассосиатсияи истеҳсолкунандагон ва паҳнкунандагони маводи радиотелевизионӣ хабар доданд. Тибқи иттилои манбаъ, чорабинии мазкур бо ташаббуси Ассосиатсияи истеҳсолкунандагон ва паҳнкунандагони маводи радиотелевизионӣ ва мусоидати молиявии Фонди канадагии ташаббусҳои маҳаллӣ гузаронида мешавад. Ассосиатсияи истеҳсолкунандагон ва паҳнкунандагони маводи радиотелевизионӣ соли 2011 таъсис ёфта, ҳадафаш ҳифзи манофеи ташкилоти мустақили радиотелевизионӣ ва продакшн-студияҳо мебошад. Муассисони он ТВ «СМТ», ТВ «Мавҷи озод» , ТВ «Регар», ТВ «Қўрғонтеппа», ҶДММ «Ориёномедиа», ТВ 5-и Конибодом ва ТВ «Симо»-и Панҷакент мебошанд. Дар айни ҳол 15 воситаи электронии ахбори мустақил узвияти Ассосиатсияро пазируфтаанд.