Вохӯрии Сафири Тоҷикистон бо муовини вазири молияи Давлати Кувайт

Душанбе, 27 феврал (АМИТ «Ховар»).- Сафири Фавқулодда ва Мухтори Ҷумҳурии Тоҷикистон дар Давлати Кувайт Зубайдулло Зубайдов 24 феврали соли 2013 бо ҳамраиси Комиссияи муштараки байниҳукуматӣ оид ба ҳамкориҳо миёни Тоҷикистон ва Кувайт – муовини вазири молияи Давлати Кувайт Халифа Мусоид Ҳамода мулоқот анҷом дод. Зимни вохӯрӣ масоили рушди алоқаҳои тиҷоратию иқтисодӣ миёни Тоҷикистон ва Кувайт, инчунин масъалаҳои вобаста ба баргузории ҷаласаи якуми Комиссияи муштараки байниҳукуматӣ оид ба ҳамкориҳои Тоҷикистон ва Кувайт мавриди муҳокима қарор гирифтанд. Ҷонибҳо рушди минбаъдаи ҳамкориҳоро байни палатаҳои савдо ва саноати ду давлат муҳим шумориданд. Халифа Мусоид Ҳамода зикр кард, ки ҷониби Кувайт омода аст робитаҳои дуҷонибаро бо Тоҷикистон дар соҳаҳои иқтисод, сармоягузорӣ, тиҷорат, энергетика, илм ва фарҳанг густариш диҳад.