Брифинги ҳайати ИМА дар Душанбе

Душанбе, 1 март (АМИТ «Ховар»).- 28 феврали соли 2013 дар ҳамкорӣ бо Вазорати корҳои хориҷии Тоҷикистон ва Сафорати ИМА брифинги ҳайати ИМА барои намояндагони расмии Тоҷикистон оид ба вазъи амниятӣ дар Ҷумҳурии Исломии Афғонистон баргузор гардид. Бо мақсади барпо намудани брифинги мазкур ҳайати Департаменти давлатӣ ва Вазорати мудофиаи ИМА аз Вашингтон ба Душанбе сафар намуд. Ҳайати ИМА-ро ёвари вазири мудофиаи ИМА Дэвид Сидней ва муовини ёвари Котиби давлатӣ оид ба Осиёи Ҷанубӣ ва Марказӣ хонум Лин Трейси роҳбарӣ намуданд. Дар брифинг намояндагони сохторҳои қудратии Тоҷикистон ва Вазорати корҳои хориҷии ҷумҳурӣ низ иштирок доштанд. Ҳайати Тоҷикистонро муовини Фармондеҳи Гвардияи миллии Ҷумҳурии Тоҷикистон оид ба иктишоф ва тайёрии махсус Раҷабалӣ Маҳмадалиев роҳбарӣ намуд. Зимни брифинг ҳайати ИМА ба ҷониби Тоҷикистон доир ба вазъи амниятии имрӯзаи Афғонистон ва нақшаҳои муштарак оид ба интиқоли уҳдадориҳои амниятӣ ба Ҳукумати Афғонистон маълумот то соли 2014 ва пас аз онро пешниҳод намуд ва ба саволҳои ҷониби Тоҷикистон оид ба масъалаҳои гуногун посух дод. Бояд зикр кард, ки ин даври сеюми брифинги мазкур мебошад ва он ҳар сол мунтазам аз соли 2011 барои кишварҳои Осиёи Марказӣ баргузор мегардад.