Мулоқоти Эмомалӣ Раҳмон бо Вазири корҳои хориҷии Қазоқистон

Душанбе, 28 март. (АМИТ «Ховар»).-Нимаи дуюми рӯз Президенти кишвар Эмомалӣ Раҳмон Вазири корҳои хориҷии Ҷумҳурии Қазоқистон Ерлан Идрисовро, ки бо сафари расмӣ ба Тоҷикистон ташриф овардааст, ба ҳузур пазируфт.Дар мулоқот масоили ҳамкории гуногунпаҳлӯи Тоҷикистону Қазоқистон баррасӣ шуд.Президенти кишвар Эмомалӣ Раҳмон ҳамкории Тоҷикистону Қазоқистонро “намунаи хуби ҳамкории созандаи минтақавӣ” номида, изҳори боварӣ намуд, ки минбаъд робитаҳои дӯстонаи ду кишвар боз ҳам қавитар мегарданд.Ерлан Идрисов ҳамроҳшавии Тоҷикистонро ба Созмони ҷаҳонии савдо ва дар шаҳри Душанбе баргузор шудани ҳамоиши вазирони корҳои хориҷии кишварҳои Гуфтугйи Осиё доир ба ҳамкориро нишонаи возеҳи болоравии обурӯю нуфузи ҷаҳонии кишвари мо номида, Сарвари давлат Эмомалӣ Раҳмон ва мардуми ҷумҳуриро бо дастовардҳои муҳими глобалӣ таҳният гуфт.Зикр гардид, ки ҳаҷми гардиши молу маҳсулот миёни Тоҷикистону Қазоқистон дар соли 2012 ба зиёда аз 700 миллион доллари амрикоӣ расида, нисбат ба соли 2011 150% афзудааст. Ҳамзамон таъкид гардид, ки имкону захираҳо барои боз ҳам афзун намудани ин нишондод хеле зиёд аст.Барои ин фаъолияти бештари мақомоти муштараки ҳамкории дуҷонибаю бисёрҷониба, аз ҷумла Хазинаи сармоягузории мустақими Тоҷикистону Қазоқистон, зарур шумурда шуд.Ба роҳ мондани ҳамкории созанда доир ба истифодаи босамари захираҳои обию энергетикии Тоҷикистон ва минтақа низ аз мавзӯъҳои муҳими суҳбат буд.Гуфтугӯи судманд доир ба беҳсозии фазои ҳуқуқӣ барои кор ва будубоши бемонеаи муҳоҷирони кории Тоҷикистон дар Қазоқистон ва ҳамчунин доир ба густариши робитаҳо дар соҳаҳои маориф, илму техника, фарҳанг ва ҷаҳонгардӣ сурат гирифт.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.