«Силро нагузоред, ки маро кушад»

Душанбе, 27 март. (АМИТ «Ховар», Кристина Эрлих). – Мардуми ҷаҳон ҳар сол 24 март Рӯзи умумиҷаҳонии мубориза бо бемории силро таҳти шиори «Силро нагузоред, ки маро кушад» қайд менамоянд. Тавре ки намояндаи масоили марбут ба аҳли ҷамъияти Намояндагии созмони ҷаҳонии тандурустӣ дар Тоҷикистон Таҳмина Алимамедова ба мухбири АМИТ «Ховар» хабар дод, соли дуюм аст, ки дар кишварамон Рӯзи умумиҷаҳонии мубориза бо бемории сил таҳти ҳамин шиор қайд карда мешавад. Мувофиқи суханони Таҳмина Алимамедова, 27 март дар маҷлисгоҳи Маркази намояндагии Созмони умумиҷаҳонии тандурустӣ бо мушорикон аз рӯи масоили бемории сил мулоқот баргузор гардида, зимни он ба хадамоти озмоишгоҳҳо таваҷҷӯҳи хоса зоҳир мегардад. Қобили зикр аст, ки 24 марти соли 1882 сироятшиноси немис Роберт Кох аз кашфи сирояти бемории сил хабар дода буд. Баъди сад сол, яъне соли 1982, Иттиҳодияи байналмилалии мубориза бо бемории сил ва бемориҳои шуш пешниҳод намуд, ки 24 март ба таври расмӣ Рӯзи умумиҷаҳонии мубориза бо бемории сил эълон карда шавад.