Вохӯрии сафири Тоҷикистон бо вазири корҳои хориҷии Украина

Душанбе, 4 март. (АМИТ «Ховар»).- 1 марти соли 2013 вохӯрии Сафири Фавқулодда ва Мухтори Ҷумҳурии Тоҷикистон дар Украина Шуҳрат Султонов бо вазири корҳои хориҷии Украина Леонид Кожара баргузор гардид. Зимни мулоқот ҷонибҳо ҳолат ва дурнамои рушди робитаҳои дуҷониба, дар шаҳри Душанбе баргузор намудани ҷаласаи Комиссияи байниҳукуматии Тоҷикистону Украина оид ба масъалаҳои иқтисодиро мавриди муҳокима қарор доданд. Вазири корҳои хориҷии Украина ҳавасмандии Украинаро дар инкишофи муносибатҳо дар соҳаҳои гуногун бо Тоҷикистон таъкид сохт. Мусоҳибон инчунин масъалаи ҷудо намудани қитъаи заминро барои сохтмони Сафоратхонаи Тоҷикистон дар шаҳри Киев баррасӣ карданд. Дар охири мулоқот сафири Тоҷикистон ба вазири корҳои хориҷии Украина аз номи сафирони 10 кишвар бахшида ба Рӯзи байналмилалии Наврӯз нома супорид ва ӯро ба ҷашни Наврӯз, ки дар шаҳри Киев доир мегардад, даъват намуд.